تلميحات

Thursday, August 22, 2013

عصيدة : مرة واحد مصرى مات

مرة واحد مصرى مات
مصرى صاحبى مات
مصرى زميلى مات
أو مكن مصرى معرفوش برده مات
و حتى قلبى مصرى مات

مصرى قال رأيه مات
و مصرى مقالش برده مات

واحد كان مع رئيسه مات
رئيس كان فاكر أنه يقدر بس فكره مات
أما التانى كان مع جيشه برده مات
جيشه قاده واحد قلبه مات
و خلى صوت كل مصرى مات
و التالت كان بيصلح ما بينهم اطخ رصاصة مات
رصاصة جت من هنا أو من هنا قعدنا نتخانق و نسينا أنه مصرى مات

فيه ناس عشان مصلحتها ضميرها مات
منهم ناس بتسال ازاى ده مات
و ناس بتقول ان الجماعة شيطان مسئول عن اللى مات
و ناس بتقول الجيش خاين هان عليه اللى مات
كل واحد فيهم داس برجليه الوسخة عللى مات
يا رب متسامحش اللى شمتان فى اللى مات
احرق كل واحد فرحان فى مصرى مات

طيب يانا زعلان عللى مات؟
بس الظاهر حتى دمى الاحمر مات
يا رب صحى جوايا الأمل اللى مات
انفخ فى قلبى الروح بعد ما مات
و يا رب خد بحق المصرى اللى مات
اغفر لكل واحد مصرى مات
يا رب أفضل مصرى لحد الممات