تلميحات

Tuesday, April 17, 2012

خبطة كوع بتوجع

 حسيت انى عاوز اكتب حاجة عن اى حاجة ، عاوز انفس شوية ، فى الأول ادعو دعوة لجدتى ان ربنا يرحمها.
كتير بيموت ناس قريبين منك و بيروحو ، الموت بيخليك تفكرفى حاجات جديدة على ذهنك و تراجع نفسك فى حاجات فاتت ، الموت على الرغممن انه حقيقة ثابته مش ممكن تتغير و من   ضمن اهدافه انه يخليك تعيش صح. ...
مش عارف ،
الانسان ده برده غريب، علر الرغم من وضوح فكرة الموت و مهمته ،الا ان الانسان بيستغبى او بيستعبط ،ما لو مكنش بيستعبط كان زمانه فهم و لو كان فهم كان حاله اتظبط. ...بس بيتصلح شوية و ترجع ريما لعادتها القديمة ، ناس كتير بيكون غلط فى حقهم بس برده بيرجع يغلط فى حقهم و حق ناس جداد ، ذنوب كتيرة بيعملها و بيفضل يعملها و يعمل ذنوب جديدة ، بيفضل لايص و تايه فى سراديب الدنيا و يتوه نفسه عن مقصده، حاجات متير بيبقى مقصر فيها. ....موت حد قريب من الانسان بيبقى عامل زى الكوع اللى بيخبطه فى جنبه جامد مة غير ما يعمل له Rupture spleen عشان يصحيه و يفوقه. ...بس المشكلة لما يكون نومه تقيل. ..اوى. ...او حته ميكنش عنده جنب يتلكز فيه اساسا،
الانسان ده روحه محتاجة تتجلى )بكسر الجيم (  و تتمسح كويس من الجلخ اللى عليها ، حاول تستفاد من الكوع ده قبل ما الدنيا تتاخر اوى ، ربنا يستر ، غيروا ما بانفسكم يرحمكم الله ، التغيير  لازم تختاره و لازم تعمله...ايا كان هو ايه.. بس لازم يكون لفوق مش لازم يبقى زاويته 90 درجة بس المهم يكون لفوق...اى زاوية و السلام. ..الموضوع فى اوله صعب عشان الجاذبية هتشدك لتحت. .
.لكن مجرد انك تخرج من الجاذبية هتنطلق و ممكن تخلى زاويتك قايمة 90 درجة و مش هتنزل لتحت تانى. .. المهم انك تخرج و تصبر لغاية ما تخرج.
آخرحاجة هقولها ، ارفع راسك للسما و ادعى و نزل عينيك للارض و سامح اللى حواليك....سامحنى معاهم ابوس ايدك يا اساحبى و من قدم شئ بيداه التقاه و هنيالك يا فاعل الخير و دعوة هنية تكفى ميه.
)اللهم اغفر لها و ارحمها و تجاوز عن سيئاتها و اجعل قبرها روضة من رياض الجنة و ارزقها قصرا فى الجنة(